SƏHİYYƏ NAZİRLİYİNİN “ÇİN SƏDDİ” - NAZİR SÖZÜ -

7-01-2019, 14:00            43 dəfə baxılıb
 BU "XƏSTƏLİK" SAĞALMAZSA FƏSADLARI DAHA TƏHLÜKƏLİ OLA BİLƏR 

Uzun illərdir ki, “müalicəsi tapılmayan xəstəlikdən” əziyyət çəkən Azərbaycan səhiyyəsinin düşdüyü bərbad durumdan çox yazılar yazılıb, tənqidi fikirlər səsləndirilib. Çifayda, indiyə qədər milyardların sərf edildiyi bu sistemi metastaz kimi daxildən məhv edən problemlər olduğu kimi qalmaqdadır. Ölkə səhiyyəsinin yarıtmazlığından, bahalılığından içi nazir qarışıq (Almaniyada aldığı müalicəni nəzərə alsaq) baş götürüb qonşu ölkələrə gedən xəstələrin statistikası ildən-ilə artan xətlə davam edir. Bu illər ərzində nə edilsə də tibb personalının gözü xəstələrin cibindən, xəstələrin gözü qonşu ölkələrin xəstəxanalarından yığılmadı.

Artıq elə bir vəziyyət yaranıb ki, Səhiyyə Nazirliyi haqqında tənqidi fikirlər səsləndirmək də mənasız görünür. Bu yerdə adamın yadına “dəyirman bildiyini edir, çax-çax baş ağrıdır” məsəli düşür. Çünki, nə qədər yazsaq, tənqid etsək, tutarlı arqumentlər gətirsək belə indiyə qədər kimsənin tükü belə tərpənməyib.

Rubrika.az saytı bildirir ki, bütün bunların əsas səbəblərindən biri səsləndirilən fikirlərin ünvanına çatmasına sədd çəkən şəxslərdir. Onlar deyilən tənqidlərin, səsləndirilən arqumentlərin nazirə çatmaması üçün sərf etdikləri çabanın mində birini səhiyyənin inkişafı üçün etsəydilər, indi Azərbaycan səhiyyəsi tamam fərqli biçimdə olardı. Səhiyyə nazirinin müavini Nigar Əliyeva, nazirliyin aparat rəhbəri Zəkiyyə xanım, Tibbi Yardımın Təşkili şöbəsinin müdiri Gülmirzə Poladov hər vasitə ilə sanki ictimai fikirlə, media ilə nazir arasında "Çin səddi" rolunu oynayırlar. Dəfələrlə tərəfimizdən nazirliyin fəaliyyəti ilə bağlı tutarlı dəlillərlə yazılmış araşdırmalar, digər həmkarlarımızın bu mövzuda yazıları heç bir effekt verməyib. O cümlədən, tək 2018-ci ildə nazirin qəbulu ilə bağlı öz imzamla 20-yə qədər müraciət ünvanlasaq da "quyunun başında duran yeddi başlı əjdahadan" o tərəfə keçə bilməmişdi. Belə ki, bir daha cənab nazirin diqqətinə çatdırıram ki, on ilə yaxındır ki, verdiyi göstəriş hələ də icra olunmayıb. Təəssüf hissi ilə bildiririk ki,bəzi "işbazların" əməllərinin ucbatından nazir sözünün də kəsəri qalmayıb. Səbəbi isə dediyimiz kimi işini-gücünü atıb tənqidi fikirlərlə nazir arasında sədd çəkən mənsəb sahibləridir.
Səhiyyə nazirliyi artıq illərdir ki, həkimlərin işə qəbulu prosesinin mərkəzləşdirilmiş qaydada həyata keçirilməsi ilə bağlı məlumatlar yayır. Səhiyyə nazirliyinin rəsmi məlumatına inansaq, Azərbaycan Respublikası Prezidentinin 05 sentyabr 2012-ci il tarixli sərəncamı ilə təsdiq edilmiş “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nın icrası ilə bağlı Azərbaycan Respublikası Səhiyyə Nazirliyinin Kollegiyasının 18 yanvar 2013-cü il tarixli 3 nömrəli qərarına əsasən Səhiyyə Nazirliyinin tabeçiliyində olan tibb müəssisələrində vakant elan edilmiş yerlərə həkimlərin işə qəbulu mərkəzləşdirilmiş qaydada aparılır. İlk baxışdan olduqca demokratik, şəffaf bir mənzərə adamın gözləri önündə canlanır. Amma səhiyyəmizdə elə bir iş olarmı ki, onun amması olmasın...
Rubrika.Az saytı bildirir ki, ucqarlarda bu proses müəyyən qədər müəyyənləşdirilmiş qaydalara uyğun aparılsa da Bakının nüfuzlu xəstəxanalarında mənzərə tamamilə başqa cürə olur. Belə ki, paytaxtın tibb ocaqlarına işə qəbul müəyyən maraqlar çərçivəsində baş tutur. Xəstəxanalarda boş yerlər vakant verilmir, Tibb Universitetinin məzunları isə rezidentura adı altında həmin yerlərə göndərilir (bu zaman qeyd etdiyimiz “xüsusi maraqlar” işə düşür). Yalnız nadir hallarda gözdən pərdə asmaq üçün vakant yerlər elan olunur ki, bu da ümumi sayda bəlkə də heç 1 faiz təşkil etmir. İşə qəbulla bağlı dəfələrlə tənqidi yazılar hazırlasaq, nazirliyə müraciət etsək də heç bir tutarlı cavab ala bilməmişik. Yalnız nazirliyin kadrlar şöbəsinin rəhbəri Kəmalə xanım acı etirafı ilə mövcud vəziyyətə aydınlıq gətirmişdi: “Bütün bunlar məndən yuxarı səviyyədə həll olunan məsələlərdir, biz yalnız sənədlərə qol çəkirik" və yaxud Tibbi Yardımın Təşkili şöbəsinin müdiri Gülmirzə Poladovun telefon əlaqəsi ilə bildirdiyi kimi "Yazıçılar Poliklinikasına qanunsuz həkimlər götürülürsə bu barədə biz də heç nə edə bilmiriksə yalnız məhkəmə qərar verə bilər” deməsi səhiyyəmizin hansı durumda olmasından xəbər verir.
Göründüyü kimi, nazirlikdəki mövcud vəziyyət orada hansısa şikayətə reaksiya veriləcəyinə, problemin həll ediləcəyinə ümid yeri qoymur. Heç inanmırıq ki, bu yazımız da “Çin səddini” aşıb lazımi instansiyaya çatsın. Biz Heydər Əliyev Fonduna, hörmətli Mehriban xanıma, Fondun icraçı direktoru Anar Ələkbərova müraciət edərək yaranmış acınacaqlı duruma təcili müdaxilə etmələrini xahiş edirik.Xüsusilə Anar müəllimin dövlətçiliyimizə sadiqliyini və eyni zamanda kimliyindən asılı olmayaraq Fonda olan müraciətlərə həssas yanaşmasını nəzərə alaraq ədalət prizmasından baxacağına inanırıq. Artıq kimsədə nazirlik səviyyəsində hansısa müsbət dəyişikliyin olacağına inam qalmayıb. Azərbaycan səhiyyəsinin bu günü və gələcəyi üçün böyük təhlükə olan mövcud vəziyyətə təcili müdaxilə olunmalı, günahkarlar cəzalandırılmalıdır. Bu “xəstəlik” sağalmazsa fəsadları daha təhlükəli ola bilər.

Rubrika.Az

Aim.azшаблоны для dle 11.2









© 2018 Azərbaycan İnformasiya Mərkəzi
Məlumat internet səhifələrində istifadə edildikdə müvafiq keçidin qoyulması mütləqdir.
Bizimlə Əlaqə : E-mail : aim.az@inbox.ru
Sayt Webmedia.az tərəfindən hazırlanmışdır.